Asina ta corona boso trabou
Tico Vos
NOS TA SIGUI REKORDA BOSO PA SEMPER DEN NOS KURASON I NOS MEMORIA! Konmemorashon mester bai biba mas profundo serka nos tur!
Manera tur aña riba dia 20 di aprel, Fundashon Restourashon Víktima di Guera na Kòrsou den koperashon ku Sektor di Kultura i Deporte, a konmemorá e fecha akí ku presensia di Minisiter di Enseñansa, Siensia, Kultura i Deporte, drs. Marilyn Alcalá-Wallé, minister di Desaroyo Sosial, Labor i Bienestar ing. Hensley Koeiman, parlamentario Jesser El Ajoubi, Kònsul General di China sr. Li-Yung , oradornan spesial sr. Junnes Jago, sr. G. Bakhuis i sr. E. Cova, representante di mundu di sindikato, famianan di víktimanan di guera derá den chiké di porko i famia di testigu okular ku a presensia e matansa kruel riba 20 di aprel aya na 1942 i un públiko respetá ku a hasi akto di presensia pa mustra respèt pa e fecha históriko aki 20 di aprel.
Wim van Lamoen | Ew. G. Bakhuis | Junnes E. Sint Jago
minister Alcalá-Wallé | minister Hensley Koeiman | Errol Cova
Realidat ta ku tur aña ta para ketu na e loke a sosodé ora nabegantenan chines riba barkunan di zeta (tankeronan den mal estado) di CPIM a welga pa buska mehoransa pa nan seguridat riba e barkunan ei ku tabata mal ekipá pa eventual bomabardeo di supmarinonan aleman ku tabata yag riba e tankeronan akí pa senknan i asina stroba ku CPIM (Kòrsou) lo por a sigui abastesé aliadonan ku kombustibel den segunda guera mundial i e guera kontra Adolf Hitler i su poderio militar tratando na konkistá Oropa i mundu den un guera relámpago (blitzkrieg)
Sr. Bakhuis ku sitanan for di beibel a mustra bon kla ku krimen no ta kaduká den tempu pero ku grandesa ta, ora nos por rekonosé kos kosnan inkorekto òf ku a bai malu. Ela splika for di e punto di nista di Doño di Unvierso ningun hende òf nashon no por papia BON pa medio di keda sin rekonosé e aktonan kruel i bon dokumentá dje atrosidatnan kontra di chinesnan sin arma i indefenso aya na KILLING KAMP SUFFISANT Kaminda 20 pa 22 chinés a pèrde nan bida na man di sòldánan bou di mando di gobièrnu ulandés.
A bolbe hasi un yamada pa Gobièrnu di Kòrsou e aña aki SI, den nan seremonianan ofisial pa rekordá víktimanan di guera inkluí un parada ofisial na e santanan akí na Kolebra Bèrdè i asina ei kuminsá un proseso di sanashon i rekonosimentu ku akshonnan konkreto mustrando asina ku Gobièrnu ta para tras di nan mes desishon anterior di a konsiderá e personanan akí di nashonalidat chines komo víktimanan di guera.
Minister Hensley Koeiman a pidi pa midi den “time line” si nos ta hasiendo avansenan ku e informashon ku nos sa i kon esaki ta posishoná nos komo ser humano pa ku un kantidat di inhustisia i maltrato ku ta tumando lugá te na e dia akí. Inhustisia kontra trahador, kontra hende grandi, kontra miembro di famia etc.etc.
Sr. Cova a enfatisá ku e inhustisia laboral ta manifestá su mes te den nos tempu aktual i pobresa ta afektá un parti grandi di nos hendenan i sigur e grupo di penshonado. Na forma elokuente a hasi un rekorido históriko sitando for di e buki APRILMOORDEN DI NIZAAR MAKDOEMBAKS (ku no tabata presente e añanan akí na e aktividat importante akí) i rekoriendo na mes momentu abúzunan kontra e klase obreril i matánsanan ku a tuma lugá den e periodo 1939 bin topa 1942 i susesivamente para ketu na e welga den haf guiá pa heroe Felis Chakuto, e welga di 30 mei 1969 i e akshonnan un par di luna atras ku ta bolbe aki mes na Kòrsou di pone trabou abou i welga pa derechonan ku ta ser trapá.
Ew. G. Bakhuis di Christelijke Evangelisch Broedergemeente | Consul di China mr. Li-Yung | representante di mundu di sindikato Errol Cova | parlamentario Jesser El Ajoubi | sektor direkteur Kultuur & Sport mw. Sambo-Velder | Junnes E. Sint Jago di SEOC | drs. Marilyn Alcalá-Wallé, minister di Enseñansa, Siensia, Kultura i Deporte | SEOC representante Wim van Lamoen
Minister di Enseñansa, Siensia, Kultura i Deporte sra. Marilyn Alcalá-Wallé a bati e martin riba e kabes di klabu enfatisando ku fuera di traha buki i dokumentá loke a pasa, fuera di lamentá ku si esaki mester bai skol si òf nò i a mustra ku no ta sufisiente para ketu den seremonianan ku ta tuma lugá solamente un bes pa aña, pa despues tur hende bolbe bèk na nan aktividatnan di kada dia sin ku nada konkreto ta tuma lugá despues di e rekordatorionan aki, A BIRA ORA pa nos kada un tuma nos responsabilidat pa mustra ku nos ta sigui rekorda boso (e chinesnan matá kruelmente riba 20 aprel 1942) den nos kurason. Ku e desvelo dje plaka akí minister Alcalá-Wallé kier a logra komprometé nos kada unu individualmente, pa hasi algu konkreto den nos bida ku ta demonstrá ku nos ta rekordánan i ta esforsá nos mes pa den nos sírkulo di influensia nigun tipo di abuzu sea chikí òf grandi tuma lugá.
Consul mr. Li-Yung | SEOC, Wim van Lamoen | minister Alcalá-Wallé | parlamentario Jesser El Ajoubi | Errol Cova, mundo sindikato
